|  Home |  Is benis de logu nostu |  Sa storia |  Turismu |  Is traballus |  Usantzas |  S´arraccattu | 

Su logu castiau or’or’e mari
Sa costera a long’a long’e su mari esti drivessa meda de una pratzioni a s’attra e su Stadu itallianu adi detzidiu de du i ponni castiadori e de da tzerriai “Area marina protetta”.
De innui iscomintzada custa patti castiada, de Su siccu finzas a Mari mottu e a su cabudu du i funti medas arriberas de anea e accoa arroccas cun fundus e aruttas or’or’e mari coment’esti in Seu e finzas a Mai Moni.
De innia facc’a susu s’arribera esti tott’anea sempiri prus grossera finzas a Is Aruttas e Mari Ermi innui i’ naus de s’anea funti a us’e arrosu e sempri pus grosserus finzas a essi prediscas. Innia s’anea s’ammuntònada e sighidi finzas a trettu de s’arribera.
Appustis de su cabudu de Sa sturaggia du i teneusu su fund’e Su tingiosu de innui agattaus preda bianca.
Innoi agabbada su log’e mari castiau, cussa chi si narada “Area marina protetta”.
Attesu meda de sa costera s’agattanta duas isuas innidas de innui cristianu panuu s’esti frimau a du i bivi: S’isua, chi oi da tzerrianta Mal di ventre, chi esti tottu de arrocca de granitu, e Cambiona, chi a dì de oi tzerrianta Su catallanu, tottu de preda niedda.

E poitta toccada a giai una affistada pretzisa a custu arrogu de costera?
Custa patti de logu nostu esti meda nodìa po sa bellesa de sa terra, de is arimais, de su mattedu, de is mobas de linna chi de s’antigoriu crescinti in Sinni’ nostu. Ma su logu esti abarrau bellu finzas a candu sa genti chi du andada a du i traballai o a si spassiai fiada pagu o nudda.
Immoi de una bella pariga de annus sempiri prus genti àndada a mari po banniai e po ispassiu e tottu custu murighingiu faidi cambiai is cosas impeurendiddas.
Aicci anti iscomintzau a fai domus or’or’e mari, anti iscomintzau a furai s’anea gioiosa de Is Aruttas, anti iscomintzau a ghettai onnia arratza de pistuentzias me is terras po giai pru’ fruttu,  anti iscomintzau a piscai chenz’e incuru panuu.
E aicci funti scomintzendi a isparessi arratzas de pisci comenti de sa scernia, de sa musteba, de certas arratzas de cambaras. Is mattas de palla marina chi fianta  medas medas me is fundais funti sparessendi comenti de attras arratzas de mattigheddas chi crescinti in mari. Tottu custu poita toccada a non pottai a istravucciu is cosas de logu nostu cafunti cosas nodias coment’ ‘e prendas.